香港地寸金尺土，樓價高處未算高，上樓難過登天。好似房署尋日安排單身人士揀選特快編配公屋咁吖，連凶宅都一樣大把人吼，可見為求片瓦遮頭，無殼蝸牛已經到咗唔理好醜、但求就手嘅地步咯。
嗱，今期特快公屋編配計劃接獲逾八萬份申請，當中約一半屬於一人申請，可供揀選嘅單位得五百一十個咁大把，簡直爭崩頭。係人都知，列入特快編配嘅單位，全部都有啲問題，唔係曾被人上門追債，就係凶宅，點諗到呢啲咁大吉利是嘅賣剩蔗竟然成為「救命稻草」吖。唔少申請者話明為咗上樓，死人冧樓都唔怕，問你服未。
唔係講笑，好似六十幾歲嘅何先生，申請公屋超過四年都冇下文，惟有退而求其次，最終成功獲配啟晴邨一個曾發生燒炭自殺事件嘅單位。佢話唔驚鬼，最驚冇地方住喎，家陣成功上樓，終於放下心頭大石。至於另一個畸士，七十幾歲嘅袁伯一直租住私樓劏房，冇廚房冇廁所，租金要成四千幾蚊，家陣月租不過千二蚊，大大減輕生活負擔，安樂晒咁話。
仲有喎，今批單位之中嘅「凶宅王」，就係位於藍田德田邨一個發生過兇殺案嘅單位嘞，雖然房署並無公布係咪成功租出，但由於月租只需六舊幾水，平絕全港，所謂賤物鬥窮人，相信租出只係遲早問題咋。睇到喇，香港人為咗一個棲身之所，唔止扭盡六壬，直情天不怕地不怕，凶宅更不在話下，都唔知可悲定可笑。
講起就唏噓，住屋明明係生活基本需要，偏偏喺香港變成遙不可及嘅奢侈品，一方面係私樓樓價愈升愈有，買樓愈來愈難；另一方面係公屋供不應求，劏房遍地開花，連雞竇豬欄改建嘅居所一樣有價有市。呢，近日房協推出兩個資助房屋項目，超額申請逾一百四十倍，創下歷史新高，就知市民幾咁渴求安居樂業；至於由社福機構營運嘅共享房屋，一樣超額申請二十五倍，都咪話唔誇張，房屋問題到底有幾嚴重，仲使講嘅。
一句到尾，都係港府無能。唔係咩，歷屆政府都話視房屋政策為重中之重，唔係填海造地，就係打郊野公園主意，可惜講就天下無敵，做就無能為力。今屆政府一樣吹到天花龍鳳，淨係置業階梯已經五花八門，可惜全部小打小鬧，無濟於事。市民對政府解決房屋問題冇信心咯喎，唔恐慌性入市、一窩蜂申請至奇喇。
冇計嘞，港產官僚出名冇膊頭冇腰骨，淨係識做一日和尚敲一日鐘，點會關心基層疾苦吖。睇吓國家領導人吖，一聲令下「房子係用嚟住，唔係用嚟炒」啫，即刻煞停炒風，呢啲就叫有魄力有承擔嘞，港產官僚幾時至學到嘢吖？