政情：郭基煇搞App開Fb 冀港青認識大灣區

由香港廣東青年總會（總會）、明匯智庫、香港樹仁大學同廣東省社會科學院等機構合作，喺今年六月起以電話訪問方式隨機抽查，訪問咗逾八百名青年，包括香港青年同喺廣州工作或讀書嘅香港青年。

鑑於調查結果發現港青對大灣區缺乏認識，當然要諗吓計喇！總會主席曾智明話會搞一系列嘅活動推廣，總會常務副主席郭基煇話會開設手機App、Facebook專頁等平台提供資訊，除咗介紹大灣區為香港帶來嘅機遇外，亦會介紹各城市「好玩好食」嘅旅遊熱點。

霍啟山話搞粵港澳青年球賽

兩地交流都好重要，總會執行主席霍啟山就話依家正籌辦粵港澳大灣區青年人嘅足球交流賽事，希望透過多個新穎方式吸引香港青年留意大灣區發展。