中環出更：游蕙禎Plan B 宣布不參加九西補選
因宣誓風波而被取消立法會議員資格嘅青年新政游蕙禎，早前透露過可能會支持一位同路人，出戰明年舉行嘅立法會九龍西選區補選，而呢個「Plan B」有指係有「佔中牧師」之稱嘅袁天佑個仔、活躍於社運圈子嘅袁健恩。不過，袁健恩尋日就宣布唔會參與補選。睇嚟呢個Plan B正式收檔。
袁健恩喺社交網站宣布唔會參加補選，又話原因非常簡單，「與其內耗初選，不如合作對外」，覺得應該要統一戰線進行對抗至啱。換言之，就係反對民主派嘅初選大計。
稱泛民難獲多數支持
早前有報道講過，民主派想參加補選嘅話，可以向負責協調嘅民主動力提交名單，不過就要分擔初選嘅費用，參加九龍西補選初選嘅就要畀五至六萬元，而新界東仲要成十萬元添，真係有錢有得選，冇錢唔使玩。
袁健恩就話目前有機會參加補選嘅有民主黨、民協、公民黨前成員曾健超同佢自己，但基本上都冇一個得到廣泛支持，無論邊個勝出初選都無法取得足夠支持咁話。唔通因為咁，袁健恩寧願慳番幾萬蚊，費事嘥心機﹖
卓妮