中環出更：朱鼎健最驚富不過三代
俗語話「富不過三代」，對於已富起來嘅大家族嚟講，其實係非常切身嘅問題。好似觀瀾湖集團主席兼行政總裁朱鼎健（Ken）咁，接手觀瀾湖十年有多，將高爾夫球會發展成多元化嘅休閒產業，但係業務擴展嘅同時，有時會開始擔心幾個乖女有無能力繼承呢個家族生意。
尋日Ken出席潮州商會嘅論壇，分享做生意嘅心得，佢就提到家族生意嘅其中一個大隱憂，正正係「富不過三代」嘅魔咒。佢話每次返內地處理業務時，如果搭飛機，就一定會搭最早嗰班，「因為一定唔會Delay（延誤）」，所以佢喺香港經常都要凌晨三、四點就起身去趕飛機，而佢出門口時，一定會叫醒幾個乖女同佢哋「Say Good Bye」。
陳智思話家族生意較重理念
Ken解釋咁做除咗因為掛住佢哋，另一原因係想佢哋知道爸爸做生意係幾咁辛苦，令佢哋明白世界係無「不勞而獲」呢樣嘢。佢又話返內地最重要係「禮多人不怪」，言論一出，立刻引嚟全場哄動，佢就急急解釋話「禮」係指禮貌，唔係禮物，哄動即變成大笑。
同場嘅行政會議召集人陳智思亦分享話，經營家族生意其實同一般生意無乜分別，都係要向股東交代，只係啲股東同你多咗一重親戚關係。但佢亦指家族生意有一個特點，就係比較重視理念。佢話早年曾經想喺香港搞醫院，說服家族成員支持時，被人質疑搞醫院回報期長兼風險高，但佢就話醫院做得好，可以幫到市民，有助提高家族聲望，成功說服親戚，但最終同港府傾唔啱條件而告吹。
另外，立法會前議員梁劉柔芬嘅女兒梁頴宇（Nisa）近年投資內地科技行業，原來佢最初係因為有遠房親戚患上肝癌，發現部分內地治療癌症嘅科技比美國仲先進，就萌生引入投資嘅念頭，然後逐漸了解內地高科技嘅潛力。
卓妮