國家領導人講過「為官避事平生恥」，身為人民公僕，一味抱着多做多錯、唔做唔錯嘅態度，係最令人睇唔起嘅。點知話口未完啫，港府就出咗第一個逃兵嘞，傳聞律政司司長袁國強好快就會辭官搵真銀去，丟低大量爛攤子都唔知點收科。
係人都知，袁國強早喺上屆已放聲氣話唔想做，之不過港府未搵到接班人，佢老哥又懶係盡責咁款，話要完成埋一地兩檢立法工作，所以留任至今。可惜姣婆守唔到寡，尋日就傳出袁司長鐵定唔撈，仲連餞別宴都定好日子添。雖然律政司發言人唔評論事件，但空穴來風，未必無因，袁國強不嬲想搵真銀，聽講連律師樓都裝修好，唔願意留喺政府又有乜出奇。
即係咁，人望高處，水向低流，打工仔想搵多啲錢，跳槽無可厚非，之但係做官就唔同講法。官員並非一般打工仔，唔止淨係搵錢咁簡單，加入政府前要向中央宣誓，除咗向市民問責，仲要對中央負責，好人好姐又唔係健康出咗問題，話唔撈就唔撈，袁司長都算係第一人咯。佢老哥到底對香港有冇承擔，視官職為服務社會嘅使命定係搵真銀嘅跳板，畫公仔唔使畫出腸喇。
冇講錯o架，家陣香港正值多事之秋，好多事項急需律政司司長處理，好似一地兩檢吖，係就係落實咗「三步走」嘅第一步，第二步亦即將喺下月展開，但最艱難嘅第三步，亦即係本地立法程序，就要出年先至正式埋牙，反對派話明一反到底，袁國強居然喺關鍵時刻拍拍屁股下堂求去，擺明將個波卸畀下手，好唔負責任啫。難為佢老哥仲實牙實齒話搞掂晒先至走人，結果講完就算，簡直唔知醜字點寫。
再講吖，爛攤子又點止一地兩檢，淨係佔中案咋，律政司拖足三年都係得九個主要搞手落鑊咁大把，身為金主兼黑手嘅漢奸黎仍然逍遙法外。正如有人話齋，落唔落鑊、檢唔檢控，律政司都應該交代一聲，袁國強一味採取拖字訣，拖到辭官就當冇事發生，呢啲唔係為官避事係乜呀？唔係姑息養奸又係乜呀，袁國強知唔知恥o架？
仲有呀，中央一再敦促港府盡快就廿三條立法，偏偏港產官僚一個二個詐傻扮懵，袁國強更係藉口多多，講到尾就係唔想掂、唔想郁。梗係喇，搵錢最緊要，乜嘢國家安全喎，乜嘢憲制責任喎，乜嘢做官要有承擔喎，關人個關咩。
一句講晒，回歸以來香港亂象叢生，洋奴漢奸橫行無忌，咪就係多得港產官僚冇膊頭兼冇腰骨囉。袁國強唔會係最後一個逃兵，香港想有運行，可能真係要搵京官治港咯！