雙學三犯保釋期間又鬧出投訴懲教署風波，促請當局檢討監獄制度云云。黃之鋒、周永康、羅冠聰入獄不過兩個多月，期間有泛民議員濫用「公務探訪」制度輪流去為佢哋探監解悶，等佢哋可以喺冷氣房又傾又抖，搞到懲教署失晒預算，因為來了一班特權囚犯，要額外調動人手招呼佢哋。如今三犯竟惡人先告狀，更在議員邵家臻、張超雄的「謢駕」下要求與懲教署署長會面，否則不排除會將行動升級云云！
反對派在議會無理取鬧已是常態，如今竟變態到要令監犯變英雄。雙學三犯在獄中得到嘅特權已是路人皆見，要投訴嘅應該係得唔到「公務探訪」嘅囚犯，不過鬼叫佢哋唔識啲咁「尊貴」嘅議員咩，又冇乜嘢亮點可以畀人抽吓水吸吓睛，好似嗰位「難民之父」張超雄，就利用「道德潔癖」為酷刑聲請留港嘅「難民」發言，無視假難民年花納稅人數以十億元計公帑以及搞到香港治安雞毛鴨血。香港就係有啲咁不知所謂嘅議員，為特權囚犯煽風點火爭「尊嚴」，為假難民爭「人權」，搞到香港永無寧日。
講番雙學三犯單嘢，其實公道自在人心。老朽瀏覽不少網民留言，可以說係一面倒鬧爆佢哋。有網民表示，咁多年嚟，在囚人士同懲教所相安無事，亦無囚犯投訴待遇；呢班溫室臭草只係坐個零兩個月監，就投訴呢樣投訴嗰樣。幾日前仲大大聲話多得袁司長令佢有個「奇妙旅程」，既然咁多謝又奇妙，咁仲投訴？快自己打嘴巴啦！
坐監豈可當度假，唔通仲要給你一個五星級的家乎？坐監失去自由和一些尊嚴，全世界都一樣。香港監獄有一套文明法規，正如懲教署指出，所有在囚人士的待遇均須得到合理和恰當的限制。黃之鋒話在囚時感到自己「好似狗」，不過點都唔係落水狗，睇佢張在囚相，肥肥白白，短髮卻精神飽滿，仲投訴乜嘢？