好多地盤都會張貼一句標語，「開開心心上班去，平平安安回家來」，其實只要稍稍改為「開開心心上學去，平平安安回家來」，掛喺學校一樣啱用，事關校園欺凌問題禁之不絕，細路放學返屋企分分鐘遍體鱗傷，家長食驚風散都食到飽。
冇錯喇，功夫茶講緊嘅咪係屯門小學嗰單畸士囉。一名小一男生懷疑被同學用手指篤眼兼用鉛筆插耳，令部分擦膠遺留耳內，要做手術取出。雖然家陣已經冇大礙，但心理陰影都唔知會持續幾耐。查實小朋友之前放學返屋企，已經試過畀人掟到成身粉筆，又試過成個書包被塞滿蠟筆，甚至講過要「喺天堂等媽媽」，可見欺凌已經持續一段時間，而且情況非常嚴重。
據家長所講，佢哋曾經向學校作出投訴，點知對方拖得就拖，一直冇正面處理，依家搞到小朋友入醫院咁大鑊，學校居然話可能係個細路自己整親，連搵個人嚟探吓都冇；就算被傳媒踢爆，群情洶湧，都施施然隔差唔多成個禮拜至出嚟公開交代，問你怕未！講到呢度，功夫茶不期然諗起湖南一間中學近日肺癆大爆發，幾十人中招，校長一度堅持「唔死人唔停課」，被指隱瞞疫情，視學生性命如草芥。如果今次有人怕影響校譽臭屎密冚，大事化小，小事化無，咁就直頭有異曲同工之劣。
即係咁，校方處理手法固然好有問題，教育官僚反應亦係慢幾拍。教育局局長楊潤雄話正在了解事件，強調教育局有指引同培訓協助學校處理相關問題，會要求教育局及學校用零容忍態度處理事件，官樣文章，講咗等於冇講。好想請教一下楊局長，既然當局指引培訓協助做到足，點解校園欺凌事件仲係不絕如縷？之前有一項國際性研究發現，超過三成本港中學生聲稱一個月最少遭受欺凌幾次，近一成人指曾遭同學毆打或者推撞，比率冠絕全球。至於近年愈演愈烈嘅網絡欺凌，教育官僚同樣係冇晒符。
唔怕唔識貨，最怕貨比貨，全球各地政府關注校園欺凌，有晒具體措施同步驟。好似日本咁，一早已經設立全國二十四小時求助熱線，確保家長同學生隨時獲得專業幫助。英國政府開設網上匿名舉報平台，內容只有被舉報者學校嘅教師睇得到，保證密密實實；挪威當局嘅「零容忍方案」更加係名副其實，唔似得楊局長咁得個噏字，除咗推出篩選標準供教師參考，及早識別有可能施暴嘅學生；仲為受欺凌者開設課程，教授如何應對添。
做人最緊要有同理心，高官雖然送晒啲仔女去外國又或國際學校讀書，都唔代表可以對校園暴力免疫，唔通真係要針拮到肉至知痛？