政情：梁頴宇奪亞洲創投「奧斯卡」
本港不時被批評創科創投方面，落後於其他國家同地區，亮眼嘅成績一向都唔多。不過，原來港區全國人大代表梁劉柔芬嘅女兒、香港創業投資者聯盟召集人梁頴宇（Nisa）與同事，最近奪得亞洲創投「奧斯卡」，即係AVCJ 2017嘅Venture Capital Professional of the Year。
喺內地發展 女士有優勢
據知，呢個獎項過去兩年都係由外國知名嘅科技企業取得，Nisa話相信今次係首次由港人奪得，仲要係女性攞到。聽落真係為港爭光！Nisa話今次攞到呢個獎，自己都相當意外，亦覺得好榮幸喎，今次攞到呢個獎，係因為公司成績相當好。
Nisa講起，較少女仔從事創科創投嘅工作，但喺內地原來有優勢，試過有內地企業覺得要畀多啲機會女士，相反喺美國，性別歧視就頗嚴重，加上佢係亞洲人，從事創科創投工作，就被雙重歧視添！