最近接連有足球賽事發生噓國歌鬧劇，令人煩不勝煩，如果計埋年前嘅世界盃外圍賽，都唔知係第幾次噓國歌咯。真係好想問吓呢班大帝，噓國歌除咗換來《國歌法》立法，換來中央對香港嘅全面管治權，到底有乜嘢得着呢？
係人都知，全國人大常委會本月四日通過將《國歌法》納入《基本法》附件三，但香港仍然有人無視有關決定，繼續亂噓國歌，係咪應該設立追溯期加以阻嚇，最近引發唔少爭議。有法律界人士就話，《國歌法》屬於全國性法律，亦已在香港實施，只不過港府未完成本地立法，存在灰色地帶啫，中央大可以從人大常委會通過當日起依法追究，咁就唔算設立追溯期，亦唔會同本港法律精神有牴觸嘞。
聽到喇，搞事者恃住「空窗期」，以為鍾意點都得，其實主動權由始至終喺中央手裏，係都要玩嘢咯喎，係都要以兩制挑戰一國咯喎，咁就唔好怪中央無情嘞。講真，《國歌法》立法並唔係無緣無故o架，而係部分港人噓國歌在先，屢勸不聽在後，治亂世咪惟有用重典囉，除咗怪自己，仲可以怪邊個吖。反對派動輒將《國歌法》妖魔化，如果唔係出於無知，就係出於無恥。
唔係咩，反對派郁啲就話中央干預香港事務、破壞一國兩制，偏偏唔諗吓自己做過啲乜、邊個先係始作俑者，近年中港矛盾之所以愈演愈烈，陷入惡性循環，全部都係因果報應咋。試諗吓，如果唔係戴妖等人來勢洶洶提出「佔中核彈」，中央就唔會頒布「八三一框架」；如果唔係有小學雞政客喺立法會宣獨辱華，人大就唔會主動釋法；至於建議為《國歌法》設立追溯期亦係同一道理，冇人喺「空窗期」搞搞震，又何必追溯吖。所以話啫，有人係都要無事生非，一再觸動中央神經，結果就係換嚟更多規管，呢啲咪叫自己攞嚟衰囉。
講起就扯火，反對派唯恐天下不亂，刻意混淆視聽，誤導支持者以為兩制可以凌駕一國，講到尾就係居心不良，就係港獨思維作祟，再咁落去，香港遲早玩完。唔係講笑，近年香港競爭力跌跌不休，就連過去港人睇唔起嘅深圳亦後來居上，部分港人仲好似發夢咁，一味沉迷政治鬥爭，不思進取，到頭嚟損失嘅係香港咋。好似噓國歌咁，噓完又唔會多咗忽肉，反而多咗法例規管，敬酒唔飲飲罰酒，你話係咪自作孽吖。
點都好喇，港獨分子冥頑不靈，唔見棺材唔流眼淚，根本唔使畀面，唔該港府快啲進行《國歌法》本地立法，將違法分子繩之以法，千祈咪畏首畏尾，死拖爛拖吖。