政情：梁美芬玩神秘 選人大拒表態
港區全國人大代表選舉提名期即將展開，早前盛傳身為法律學者嘅立法會議員梁美芬有意參選，但自從傳出有關方面唔希望太多議員身兼人大職務後，梁美芬嘅參選取態似乎有微妙變化，佢尋日同傳媒聚會時拒表態係咪參選人大，只係話到報名時就會知道，佢重申最終決定係點都純屬個人決定。
話要同所屬政黨討論
梁美芬強調自己熱愛現時工作，而能力範圍內亦都願意付出更多，而且有關範圍不限於香港。至於係咪參選人大，佢話要同所屬政黨討論，亦要視乎環境因素，再被追問係咪參選時，佢繼續保持神秘，話到報名時大家就會知道。
雖然佢拒就係咪參選人大明確表態，但透露最少鼓勵三人參選人大，包括教育評議會主席何漢權、公開大學科技學院院長何建宗同律師會前會長林新強，至於人大提名取向，佢就話要視乎同參選人有冇曾經合作過同埋其過往表現。