政情：陳恒鑌帶隊 前高官入鄉做慈善
立法會議員陳恒鑌（Ben）帶埋多名前高官，包括食物及衞生局前局長高永文、勞工及福利局前局長蕭偉強同食衞局前政治助理陳凱欣去到廣西北海嘅鄉村地區，唔通一齊耕田？原來阿Ben搞咗個慈善團體，今次帶埋啲前高官一齊探鄉村嘅留守老人同兒童。
探留守老人及兒童
阿Ben話自己都係喺潮州嘅農村長大，五、六歲嗰陣仲試過喺農村患肝炎，睇乜嘢都係黃色，但見到黃色又會嘔，所以病嗰陣就嘔到七彩喎。唔知今次見到咁大塊黃色嘅田，佢又有冇嘔呢？佢話今次行程遇到一個留守老人係村退休幹部，身體唔好，有啲負面情緒，高永文就同老人講，自己同蕭偉強都係退休老幹部，可以互相關心喎。
其實內地唔少壯年人都會去城市打工，令鄉村地區都會有留守老人同留守兒童。阿Ben喺幾年前搞咗個慈善團體，希望喺農村興建多間衞生站，令呢班人有得睇醫生，改善健康同心理問題。