政情：單頭議員困牆角結盟（抓）存在感
隨着六名非建制派先後被取消立法會議員資格（DQ），激進派嘅窘局進一步浮面，唔單止群龍無首，而且各自修行，成為非建制派嘅核心外圍，無法與核心內圍嘅三大板塊民主黨、公民黨同專業議政「平起平坐」，立法會非建制派嘅「單頭」議員被逼埋牆角，終於靜極思動，自決派朱凱廸、人民力量陳志全等四人起「朵」，暫定成立名為「議會陣線」嘅新板塊抗衡，講到尾都係想有存在感，真正做到命運自主自決，唔想畀同路人或者建制派當「透明」。
現屆立法會喺舊年十月開局，原本有一大批「單頭」議員，包括自決派朱凱廸、劉小麗、姚松炎、香港眾志羅冠聰、香港本土毛孟靜同街工梁耀忠等，加上社民連梁國雄等多名喺議會抗爭多時嘅激進派，原以為真係可以有一番作為，之不過政治一日都嫌長，一場DQ風暴，令劉小麗、姚松炎、羅冠聰同梁國雄等多名「單頭」議員嘅議會之路行人止步，加上其他「單頭」議員亦聲勢大不如前，予人有進退失據之感。
同非建制三大板塊矛盾不斷
及至近期，非建制派內三大板塊同「單頭」議員嘅路線矛盾愈來愈明顯，首先係上周立法會通過施政報告嘅致謝議案，除咗建制派全數歸隊投票支持外，竟然分屬非建制派重要板塊嘅專業議政有三人，包括會計界議員梁繼昌投票支持致謝議案，咁樣令激進派同單打獨鬥嘅議員感到不是味兒。
其次喺最近高鐵一地兩檢無約束力議案一役，朱凱廸突然出「怪招」，引用九七回歸以來從未使用嘅《議事規則》第八十八（一）條，要求新聞界及公眾人士離場的動議，事後非建制派內部嘩然，但因為槍口一致對外關係，先硬住頭皮無公開唱反調，其實唔少人私下都好有意見。
至於正在上演嘅建制及非建制派陣營就修改《議事規則》嘅攻防戰，進一步凸顯「單頭」議員嘅無奈，亦加強佢哋走埋一齊把槍口對外嘅決心。話說議事規則委員會包括主席在內共十二名成員，當中有四人來自非建制派，但全數由非建制派三大板塊代表包攬，朱凱廸、陳志全等人當日要喺會議外示威要求列席會議，最後一如所料未獲「開綠燈」，主張用盡議會空間抗爭嘅聲音，頃刻消失得無影無蹤。
凡此種種，可見有啲係導火線，有啲係催化劑，催生朱凱廸、陳志全、毛孟靜同梁耀忠四人組成「議會陣線」新板塊，明眼人睇得出其目的係爭取話語權，希望外界更重視佢哋嘅存在。最終呢個平台能否扭轉佢哋目前面對嘅政治困局抑或會合久再分？咁就要拭目以待嘞！