中環出更：卿姐鬧爆國泰牛肉粥冇牛肉
因管理不善喺最佳航空公司排名榜節節下跌嘅國泰航空，日前突然取消及延誤兩班返港航班，去咗以色列考察嘅立法會前議員劉慧卿（卿姐）因而滯留當地兩日，被「激到跳舞」。佢尋日中午主持網台節目後批評，回港時乘搭國泰商務客位，喺機上食嘅牛肉粥係「杰撻撻」，「連一片牛肉都冇」，又指「又冇味、又冇牛肉、點會差得咁緊要」，直指國泰有問題。
卿姐原定喺以色列當地周日乘坐國泰CX676航班由特拉維夫返港，點知航班取消令佢滯留兩日。至於國泰向佢同其他受影響嘅乘客提供一百五十美元購物劵作補償，令佢「（興）過火屎」之外，仲發現購物劵只限喺飛機上購物使用，而物品價錢較昂貴，「大佬呀，嗰百幾蚊，大部分都買唔到，嗰啲好貴o架嘛！」
此外，佢又透露係國泰航空馬可孛羅會會員，曾想用積分換機票不果，國泰職員仲叫佢排候補機位，最後花錢買咗機票，上機後發現兩程機都有好多空位，批評國泰「真係抵死」。
斥國泰處理態度差
佢話尋日朝早同國泰嘅職員會面時亦講番今次遭遇，佢引述嗰個職員話感到唔好意思，並指會了解事件。佢直斥呢次國泰喺處理事件嘅態度好差，會去信投訴，又話唔少人都對國泰有意見，希望國泰能作深切檢討。
卓妮