中環出更：象哥量血壓自嘲除咗IQ乜都高
美國心臟學會呢排收緊咗高血壓定義，由原本上壓一百四十、下壓九十，收窄到上壓一百三十、下壓八十，仲建議大家快啲改變吓生活習慣嚟控制血壓。卓妮尋日捉住好有分量嘅進出口界議員黃定光（象哥），問佢血壓靚唔靚仔，佢即刻話「靚，我梗係靚喇！」跟住攞部電話出嚟開個表，話自己間唔中都會量吓血壓、體重，依家每隔三個月就要去瑪麗醫院攞藥同驗血，Check住自己身體，仲笑住話「我除咗智商唔高，其他乜都高」。
重量級嘅金融服務界議員張華峰（肥老闆）一路量血壓就一路笑笑口，話自己有高血壓，幾乎係乜嘢標都過晒臨界點，兩個月見一次醫生先敢量血壓。
肥老闆為東坡肉食藥唔戒口
冷靜一輪，佢嘅上壓有一百三十三、下壓七十六，按新指標嚟計，上壓都係超少少啫！佢見到個血壓咁靚仔，都話係因為食咗藥，而佢食藥都係為咗東坡肉喎！佢直情話「人生得一個興趣，堅決唔戒口」，反正依家醫學昌明，靠藥物控制就得。
另一名議員尹兆堅（肥尹）未量就先講，幾年前驗身啲血管彈性係Number One o架，咁依家呢？結果佢血壓超咗少少，仲好感嘆咁話以前做區議員仲可以唧啲時間出嚟去做Gym，依家做咗立法會議員，多嘢做之餘，仲要留守議會冇時間做運動，搞到呢幾年肥咗廿磅。何止肥咗，仲蝕咗添！事關佢以前做Gym買咗一百堂教練，但用咗十堂就冇再去，嗰度都幾萬蚊o架！
游開水嘅紡織及製衣界議員鍾國斌（Felix）嘅血壓冇超標，見到心跳係六十四，佢就話「唔準嘅，個心跳都唔靚仔，如果五十幾我就滿意喇！」至於女議員葛珮帆（EQ）嘅血壓，新舊指標都唔超，佢話個數咁靚，都係有賴於自己逾三十年食素同保持常常樂觀嘅態度。
卓妮