香港成日自詡安全城市，警務處處長盧偉聰更大肆吹噓，話整體罪案數字以及兇殺等嚴重罪案均有所減少，點知呢頭講完，嗰頭就發生懷疑南亞黑幫仇殺事件，鬧市之內刀光劍影，搞出人命，一哥被摑到應一應，塊面當堂腫過豬頭。
話說牛頭角街頭前晚殺聲震天，五名南亞裔男子被八名同鄉揮刀襲擊，其中一人頸部中刀，傷重不治，另外兩人情況危殆。據聞兩班人分屬黑社會唔同「字頭」，至於係咪利益問題引發內訌，仲要查過至知。
咪以為呢啲只係個別事件，就案發地點附近之嘛，幾個月前亦有南亞幫手持長鐵通、開山刀及壘球棍等武器，互相追逐喊打喊殺；舊年十月，有南亞裔男子喺油麻地被多名同鄉亂斬狂扑，警方開槍都撳唔住；仲有佐敦港鐵站，再之前試過有南亞幫喺上班高峰期持開山刀火併，血肉橫飛。呢啲案件多不勝數，南亞幫直頭當香港係殺戮戰場，安全城市喎，呃鬼食豆腐咩！
唔知大家有冇發現，次次南亞幫開大片，警方例牌賊過興兵，佢哋到得現場嚟，收屍就差唔多。冇錯，阿Q啲諗，反正兩班都唔係好人，由得佢哋自相殘殺，自然少隻香爐少隻鬼。就好似兩批獅子老虎喺森林裏面困獸鬥，最好係兩敗俱傷，警方樂得袖手旁觀睇戲咁睇。問題係，香港地始終唔係森林，南亞幫三日唔埋兩日大街大巷開戰，沙塵滾滾，隨時誤傷良民，警方姑息養奸，同攞七百萬市民條命較飛冇乜分別。
講開睇戲，電影經常出現以下情節︰黑幫畀對家搞，然後密謀「覆灼」，雙方一來二往，行動不斷升級，今日動刀動棒，聽日分分鐘出動手榴彈機關槍互轟。警方見住南亞幫火併都仲係闊佬懶理，遲早爆大鑊嘅咋！
大家有眼睇，南亞幫被本地黑社會招攬，打家劫舍，無惡不作。而南亞幫被重用，主要因為佢哋膽正命平，特別係嚟香港食大茶飯嗰班假難民，連坐監都冇有怕，唔搵佢哋做爛頭蟀搵邊個？仲有吖，個個南亞人望落去都係千人一面，就算斷正都未必認到人，「安全系數」超高，好多案件無法偵破，就係咁解。
內地就唔同講法嘞。深圳警方早前直搗黑幫頭子婚宴拉人，將成個犯罪集團一鍋端，大快人心。反觀香港警方，每次有黑社會大佬出殯，係就係派成隊兵戙喺度，弊在十足十鵪鶉咁，拉人就冇嘞，畀蠱惑仔兜心口問候娘親就試過，簡直情何以堪。港警英明威武，如神兵天降，黑幫壞人束手就擒，講到尾都係做戲咁做啫！