國泰航空近排嘅負面新聞真係多到應接不暇。看來，國泰已經不是排名節節下跌咁簡單，其他負面新聞更令想搭其航機的市民擔心。呢，日前就有讀者黃先生指乘搭CX438航班由香港前往南韓首爾仁川機場，航班延誤約一小時。
航班延誤、取消不是甚麼大新聞，頂多好似前立法會議員劉慧卿咁，因國泰突然取消以色列返港航機而滯留特拉維夫兩日，激到「跳舞」而已！但要經東網報道後，受影響的乘客才獲發食物券，難怪劉慧卿都要炮轟國泰的安排好差。
國泰解釋話，因工程人員檢查及維修客機時，確定只有更換零件才能對航班安全營運有更充分的保障，故需額外維修時間。阿哥，臨起飛先玩啲咁嘅嘢，竟然要更換零件才可確保安全，兒戲些吧？要動「咁大手術」，不是應該一早知道及提早做好維修嗎？何以最後一刻才動工？
講番黃先生延誤嗰筆。黃先生在等待登機期間，發現有職員從機上探身出機師窗口，將膠紙張貼在擋風玻璃和機身連接處，膠紙呈「L字形」，有半塊擋風玻璃之大。黃先生直至飛行途中飛機遇上氣流，不停震盪才知驚，他擔心膠紙鬆脫會導致機師窗口入水甚至機件故障。雖然航機最後成功降落，但黃先生怒斥國泰若因擋風玻璃有破裂而需貼膠紙，根本是「攞乘客條命較飛」！佢話經此事件後，以後有其他選擇就不會再乘搭國泰。
國泰航空管理不善彰彰明甚，最近有網站公布二○一八年十大最佳航空公司排名，國泰已由第四位急瀉至第九位！「飛流直下三千尺」，此之謂也。國泰甚至連擁有三十一年的藍籌成分股身份也保不住。古人說：在上者積寬成柔，積柔成怯，積怯成畏，積畏成廢。道理在一個「積」字，國泰積落太多負面新聞，「積負成廢」，乘客望而生畏，神仙都難打救，令人唏噓。