政情：3‧11撞正兩會立會補選不改期
選舉管理委員會早前公布立法會四區補選喺明年三月十一日（三一一）舉行，但投票日撞正三月北京兩會，惹來一批身兼全國人大、全國政協嘅建制派人士怨懟不滿，因為如果佢哋想履行公民責任投票，就要做「空中飛人」，據知大批建制派人士就此向有關方面「打小報告」，據聞一批建制派聲稱「翻盤」在望，補選日期或延後一周至三月十八日進行之際，最新消息原來係一場歡喜一場空，消息指三一一補選日期原封不動，究竟係喺京城坐定定開會，抑或係專程返港投票，一眾建制派人士就要自決嘞！
立法會目前有六個議席空缺，隨着被取消議員嘅自決派劉小麗及社民連梁國雄早前決定上訴，選管會喺九月十四日公布，計劃喺明年三一一舉行四區補選，分布喺香港島、九龍西同新界東直選，以及建築界功能界別。
有人批評政府無大局意識
據了解，自從三一一補選日子曝光，建制派陣營有極大反彈，尋求有關方面改期，事關三一一補選撞正北京兩會，大批人大、政協正喺兩會開會，包括預料會成功連任人大嘅立法會體文界議員馬逢國、身為政協嘅商界議員林健鋒、金融服務界張華峰等人，此舉令佢哋左右為難，無法於京城坐定定開會同在港投票兩者兼得。
有建制派人士更私下批評政府無大局意識，千揀萬揀竟然揀中呢日，質疑係咪有心刁難甚至係唔想佢哋參與呢次補選。部分建制派人士嘅「小報告」直達京官，凡此種種，都係希望成功爭取稍為延後三一一補選日期。
倘改期 勢毀選管會公信力
由於補選日子遲遲未正式刊憲，據聞有部分建制派議員四出奔走後自我感覺良好，收到訊息係「翻盤」更改補選日期在望，不過正所謂「假的真不了」，官場最新消息係三一一補選日期原封不動，陸續亦有資深建制派人士放風，指補選日子曝光後更改前所未有，一旦發生肯定會同政治考慮扯上關係，勢必會摧毀選管會過去一段長時間建立嘅公信力；再者，當局就算順應民意更改補選日期，亦唔見得對政治大格局有顯著影響，因此私下進諫一動不如一靜，唔好增添彈藥予民主派炒作。建制派白忙一場先有遲來嘅覺醒，總好過搞出大頭佛後先度橋善後嘞！