中環出更：曾鈺成赴美論壇 不避忌與李漢奸同場
外號「李漢奸」嘅民主黨創黨主席李柱銘不時到外國「唱衰香港」，佢最近到美國出席香港回歸二十周年回顧研討會，同場仲有違法佔中發起人戴耀廷等人，最令人意想不到嘅係立法會前主席曾鈺成亦赴美成為座上客，不避忌同李漢奸同場。
指港獨無可能發生
據報呢次研討會由美國史丹福大學東亞研究所主辦，李漢奸繼續「唱衰香港」，提及有人話香港法治已死，佢認為香港法治未死，但一定已「走樣」；曾鈺成就話港人嘅民主出路係堅持一國兩制，而絕大多數港人都希望一國兩制成功，而且港獨係唔可能發生嘅。
曾鈺成過去對於港英餘孽、「唱衰香港」嘅人士同場一直戒慎恐懼，今次喺美國罕有地唔避忌同李漢奸同場，認真耐人尋味。
仲記得約一年前，曾鈺成原定答應同末代港督彭定康一同出席喺香港舉行嘅論壇，當時主題為「香港管治禮崩樂壞？」最終喺活動舉行前一個多星期，主辦單位宣布曾鈺成缺席，曾鈺成事後喺報章專欄自爆，有人指佢計劃與彭定康同場出席論壇係「罪無可赦」，而佢事先唔知論壇仲有乜嘢人主講，最終要硬着頭皮通知主辦單位唔能夠履行承諾出席論壇。
卓妮