中環出更：爭產案未了霍震宇陪媽媽食晏照顧周到
已故全國政協副主席霍英東元配呂燕妮深居簡出，但卓妮早前就見佢喺長女霍麗萍（Pat）同三子霍震宇陪同下到中環置地廣場用膳，期間兩名仔女都照顧周到，盡顯孝順一面。
當日呂燕妮手持拐杖、坐住輪椅現身，而中環午膳期間人來人往，帶老人家去嗰度確實要特別小心，而霍震宇同Pat都深明老人家要多加照顧，當日用餐就帶埋女傭同行。四人喺餐廳用膳逾一粒鐘，期間霍震宇就機不離手，但佢並無忽略同枱嘅家人，更不時遞部手機畀Pat睇，更有傾有講，相信係分享喺網上所見嘅得意內容喇！
霍麗萍全程傍實
之但係霍震宇嗰碟意粉遲遲未食完，未知係太遲上菜抑或佢只顧玩電話，搞到要成枱女士等佢一個。最後卓妮見到Pat對住霍震宇講咗幾句，估計係提醒佢食快啲，而霍震宇亦隨即加快用膳速度，食完後更迅速將碟意粉遞向侍應添，見到佢食剩晒啲蔬菜，睇嚟有啲偏食喎。
而一行人離開時，霍震宇同Pat並冇將照顧媽媽嘅責任交晒畀女傭，佢哋更全程傍實媽媽，其中Pat更翹住媽媽離開餐廳，而使用扶手電梯時，佢哋仲一左一右扶住媽媽，真係非常體貼！
卓妮最後上前同霍震宇傾咗幾句，佢話平日工作繁重，所以一有時間就會陪伴家人咁話。佢又講到媽媽雖然行得走得，身體尚算壯健，但已經成九十幾歲，所以自己都唔放心去太遠地方旅行，多數都係留港消費。至於霍家爭產案，佢就表示希望盡快完結，但就透露兄弟開會期間都仲有傾有講嘅。
卓妮