香港貿易發展局早前趁國際美酒展舉行期間，邀請星級名廚為美酒配菜，城中一眾識飲識食名人都聞香而來。講起飲酒趣事，唔少名人都有飲養生酒或藥酒嘅經歷。立法會主席梁君彥嘅細佬、貿發局成衣業諮詢委員會主席梁嘉彥（Lawrence）就晚晚飲浸過洋葱嘅紅酒，仲話好處多多，飲咗冇壞喎！

Lawrence話紅酒浸洋葱嘅做法喺網上普遍流傳，盛傳對夜尿、高血壓甚至男士前列腺問題都幾好。屋企有啲唔係太靚嘅紅酒，佢就攞嚟浸洋葱，瞓覺前飲少少，口感都幾唔錯。雖然唔知實際效果係點，但佢笑稱紅酒同洋葱都係好嘢，尤其洋葱係天然藥，殺菌一流，總之飲咗冇壞處，所以由年幾前就開始飲到依家嘞！

身兼貿發局理事嘅香港工業總會主席郭振華就試過飲「老鼠酒」，即係用啱啱出世、仍未開眼嘅老鼠浸白酒，聽落都幾得人驚。佢話老鼠酒原本同蛇酒一樣幾普遍，但係近年喺市面上就少見喇！佢唔止飲過老鼠酒，小時候仲食過老鼠粥添，話老鼠驅風，對身體好喎。

同場仲有貿發局總裁方舜文、副總裁周啟良、立法會議員鍾國斌、香港中華廠商聯合會副會長陳淑玲、一帶一路前專員蔡瑩璧都有到場。蔡瑩璧喺完成咗十一個月嘅歷史任務後，七月開始又過番退休嘅逍遙日子，最近佢同一班好友去越南玩一轉，講起旅程仲意猶未盡添。

卓妮