最近有套內地投資、以香港警方反黑組做主角嘅網劇大受歡迎，片中探員表現神勇，壞人聞風喪膽，可惜現實中本港嘅反黑工作「手軟腳軟」，雷大雨小，反而內地反黑有系統、有力度，而且手法不拘一格，屢建奇功，最近踩上黑幫婚宴拉人一幕，直頭精彩過拍戲。
廣東警方近日通報「颶風2017」成效，摧毀一百三十多個涉黑犯罪集團，其中深圳警方放長線釣大魚，自前年起立案調查一個喺深圳、東莞等地從事賭場等犯罪活動嘅大型黑幫組織，今年六月出動逾千警力，攻入主腦胞弟嘅婚宴現場，成功拘捕一百四十幾人，繳獲大批武器並凍結八百多萬元人民幣。逮捕過程仲有段小插曲。話說婚宴舞台同場放映警匪片黑幫同警方槍戰片段「助興」，當警方攻入現場時，唔少賓客以為係「特別環節」，紛紛起身拍片「留念」，你話係咪精彩過拍戲嘞。
事實上，瓦解上述黑幫集團只係成個「颶風2017」戰果嘅一小部分。珠海、佛山、東莞等市警方早前發現有人喺網上販賣火藥槍、氣槍，犯罪組織涉及廿多個省市，形成「生產、代理、買手」一條龍犯罪鏈，警方隨即採取行動，搗破十多個製槍黑點並拘捕四百多人，當中包括六十多名港人。
正所謂行家一出手，便知有沒有。香港警方反黑表現同內地同行比，輸足九條街。冇錯，警方耐唔時會做吓大龍鳳，但針對嘅黑幫活動都係「細眉細眼」，唔係掃蕩無牌酒吧，就係冚吓賭檔或色情場所，拘捕嘅十居其九亦只係「魚毛蝦仔」小角色，做騷多於一切。至於嗰啲知名度高嘅黑幫頭子，好多時查查吓冇咗下文，都唔知係咪有人玩包庇甚至放生。
有人分析內地警方情報工作深入細緻，一夠料就可以集中兵力打殲滅戰，反觀香港警方喺呢方面表現差強人意。講真，港警反黑係「不能」抑或「不為」，真係冇人知。佔中過咗三年有多，漢奸黎為首嘅一眾幕後黑手至今一直逍遙法外，司法當局嘅理由居然係「證據太多」，有關方面對住班黑幫大鱷，點知會唔會又玩呢一手o架？
數字說明一切。本港涉及三合會嘅罪案數字近年持續增加，近三年累計升幅超過一成，最令人擔憂嘅係，滯港假難民膽正命平，成為本地黑幫嘅主力軍，元朗等重災區有居民組織更練團自保，正正係用實際行動對警方投不信任一票。保安局局長李家超日前大派定心丸，話冇情報顯示香港成為恐襲目標，查實唔使等「外敵」入侵，淨係黑幫橫行加上假難民助紂為虐，香港都已經玩完喇！