政情：今日你上鏡：《國歌法》日講夜講 貝鈞奇頭都大埋

全國人大常委會通過將《國歌法》列入香港《基本法》附件三，掀起本港社會對《國歌法》嘅爭議。社會上除咗討論本地立法細節外，亦關注喺未完成本地立法前，未來多場足球賽事仲會唔會有人噓國歌，或者作出任何侮辱國歌嘅行為，連累香港足球總會或港隊受罰，以及足總又會有乜嘢預防措施等等。足總副主席貝鈞奇尋日就喺一個公開場合度笑笑口話，日日都講《國歌法》，搞到頭都大埋喇。貝鈞奇搞到頭都大埋都仲笑得出，唔知佢係苦中作樂，定係諗到計仔解決問題，所以咁開心呢？