政情：李麗娟興趣係湊孫
孫仔孫女一向係祖父母嘅心頭肉，人稱「媽打」嘅民政事務局前常任秘書長李麗娟一向為籌款不遺餘力，不過佢之前升呢做嫲嫲，所以依家除咗幫機構籌款，就係忙於湊孫，講起個孫佢就成個樣冧晒，仲話湊孫係佢近來嘅新興趣添。
影相都開心咗
媽打話，依家好多朋友都同仔女講，結唔結婚唔理你，總之求其整番個（BB）返嚟。可見佢啲朋友都求孫心切。而已經有孫嘅媽打依家仲幫緊十間機構籌款，有人就話佢「一個都嫌多啦，仲要十個」。不過媽打就話，已經幫咗呢啲機構好多年，所以放唔低，依家惟有隔日去為籌款開會，隔日湊孫。不過自從有咗個孫後，影相個樣都開心咗，相信係因為喺籌款嘅忙碌中攞到平衡。
媽打囝囝劉堃話，太太依家餵母乳，佢都替太太辛苦，覺得太太好偉大。至於會唔會生多個，媽打就話，唔敢畀壓力媳婦，因為明白對方好辛苦，加上媳婦重回職場，都仲需要適應。而劉堃就話，都想太太生多個，等小朋友可以有伴喎。