中環出更：周松崗乜都申報 生果火腿樣樣齊
近年有前高官因為申報及涉貪問題搞到一身蟻，令到行政會議成員申報利益都變得好小心，繼早前有身兼行會成員、立法會議員及區議員嘅張國鈞「自我搜身」申報四十個團體職務，其後又有行會及立法會雙料議員嘅劉業強以圖表記錄土地，以防有遺漏。最新就有身兼行會成員嘅港交所主席周松崗連收到香桃、提子同火腿都申報埋，相當巨細無遺，唔知係咪見到以往嘅風波，有啲心驚驚呢？
冇寫以咩身份收禮
根據周松崗喺九月底嘅申報顯示，佢因為中秋節收到超過二千蚊禮物，收禮日期係九月二十二日，包括有日本香桃、日本提子及西班牙火腿，仲有寫埋牌子名，處置方式列明係部分自用，部分分發畀港交所同事享用，但就冇寫到以咩身份收禮物。
根據申報規則，如果係配偶、父母等親友，或者係生日、婚禮、周年紀念日等特別場合收到嘅禮物，又或者係非行會成員都可以按同等條件獲得嘅利益，就唔使申報，雖然周松崗冇寫以咩身份收禮，但估計佢想避免有人覺得同公職有關，乜都申報定先，真係夠晒小心。
卓妮