正所謂有咁耐風流有咁耐折墮，曾經係香港金漆招牌嘅國泰航空，近年可謂黑氣纏身，除咗因為管理不善、服務欠佳而國際排名跌跌不休，依家仲被剔出恒生指數成分股，三十年嘅藍籌股地位不保，照咁睇嚟，仲可能有排衰添o架！
話時話，早排國泰被剔出MSCI香港指數成分股，當時已經有人估計佢哋被恒指成分股掃地出門，只係遲早嘅事，依家果然不幸言中。睇番數字就知點解，國泰近年業績弱過藥材舖，過去一年股價大部分時間喺低位徘徊，最低曾跌至十蚊左右嘅水平，較歷史高位足足插水近六成。咁都未算，國泰嘅市值十足十滾水淥豬腸咁，兩頭縮，依家得番不足五百億港元，係恒指成分股裏面市值最低嘅股票，比重僅佔百分之零點一左右，反觀股王騰訊就佔百分之十一有多，兩者簡直係蚊髀同牛髀。
有句經典廣告台詞係咁講嘅︰「你依家冇，但係將來會有。」而形容國泰業績，改為「佢依家衰，但係將來會更衰」可能比較貼切。該公司八月公布中期業績，由盈轉虧，錄得高逾二十億元虧損，表現係過去二十年嚟最差。管理層一早打定輸數，今年下半年經營環境唔會有大改善，證券界人士亦普遍估計國泰今年嘅業績可能再次「見紅」。
搞成今日咁嘅田地，國泰唔係自我檢討，反而一味姓賴，一時話同行競爭激烈，一時話油價持續上升。行業環境唔理想係大圍事，點解唯獨國泰表現特別不濟？最近有國際航空網站公布十大最佳航空公司排名，國泰由上次調查嘅第四位大跌五位至第九，反觀穩佔「一哥」寶座嘅新西蘭航空，連續五年執業界牛耳，呢啲咪唔怕唔識貨，最怕貨比貨囉。
至於用油價問題嚟做藉口，更加係哪壺不開提哪壺。係人都知，國泰之前炒燶期油，蝕超過八十億元，點知管理層闖下大禍，唔使問責不特止，部分更獲加薪，反而基層員工被大裁員，慘成替死鬼，簡直豈有此理。最攞命嘅係，國泰口口聲聲唔會郁前線地勤員工、機師以及機艙服務員等崗位，但背後小動作不斷，包括大幅削減機師福利，凍結增薪點、調整退休金同埋cut房津等，搞到前線怨聲載道。最近有傳內地航空公司向國泰機師招手，約二百人考慮過檔，一旦成事，服務進一步插水唔在講，航空安全分分鐘受影響，同搵乘客安全較飛冇乜分別嘅咋。
市場競爭就係咁殘酷，不進則退，汰弱留強係必然結果，有「香港人航空公司」之稱嘅國泰被恒指成分股叮走，香港繼續不思進取，內鬥內耗，遲早都難逃被淘汰命運！