政情：染髮啡變黑蕭嘉怡大呻失手
由區議員走入熱廚房嘅政務司司長政治助理蕭嘉怡（Kathy），已經返咗新工兩個多月。見佢嘅髮色由維持咗多年嘅啡金色變成黑色，唔通身份變咗，外形都要穩重啲？佢就解畫係純粹失手喎！
自嘲似戴假髮
Kathy話自己天生髮色特別黑，中學時代已經被嘲笑好似戴假髮，所以讀書時不惜勁吹頭，吹到頭髮變啡色，後來染啡金色都維持咗一段長時間。至於最近一次入髮型屋時，佢都有同髮型師提出染啡色嘅要求，但就話希望比以往深色少少，點知效果就變成依家咁嘅樣。佢大嘆仍未習慣呢隻髮色，可能要遲吓趁聖誕節再搞搞嘞。
Kathy又話，以前做區議員時經常到訪立法會，但係多數係帶小朋友參觀，而且參觀路線固定，好似到訪會議廳、觀景廊等。依家就可以進入要拍卡先入得嘅地方，特別會議廳前廳以往從未踏足過，難怪佢話依家仲要摸索喇！