政情：傳眾志敲定 周庭出戰港島區補選

因應多名立法會議員早前被取消資格，多區將會補選，早前有指民主派將會喺港島全面讓路畀眾志，不過，原本擁有港島議席嘅眾志主席羅冠聰以及眾志秘書長黃之鋒，均被判監超過三個月，五年內不可參選。早前曾傳出多個方案，包括由相對具有知名度嘅周庭或由被取消議席嘅姚松炎出選，亦傳出由羅冠聰女友袁嘉蔚出戰。

若當選成最年輕立會議員

聽聞今次眾志至少有三人有意競逐出線，但係眾志最終決定派周庭出選。周庭投身社運多年，曾任學民思潮發言人，其後與黃之鋒、羅冠聰等人創立眾志，出任副秘書長。不過早前改選時競逐連任失敗，其後僅出任常委。周庭今年底將滿二十一歲，如果當選就會係最年輕嘅立法會議員。