政情：吃力不討好泛民擬棄選人大

人大選舉採取全票制，選委需要投票畀三十六名候選人，否則就變成廢票，令到泛民可以踢走最不合心意的候選人，從而影響選舉結果，又可以透過參選去宣揚其政治理念。而過去參選過人大嘅泛民，包括民協馮檢基、白鴿黨涂謹申、單仲偕、張炳良等，但佢哋就一律低票落敗，可能試過幾次落敗，泛民似乎已經心灰意冷，認清呢個殘酷事實。

「起唔到作用」 白鴿黨率先退出

白鴿黨主席胡志偉透露，該黨經內部討論後決定唔派人參與人大選舉，更直言參選人大起唔到任何作用，唔應該參選，但屆時投票取態及策略就仍未決定。胡志偉呢個講法，似乎反映該黨感受到以往派員參選係自討沒趣喇。

胡志偉更表明，不參選嘅決定係吸取咗過往經驗，因為以往參選係希望將泛民嘅想法帶到人大選舉中，他更形容呢個只係主觀願望，過往係完全辦不到。佢仲話，泛民參選更招致各種不同嘅演繹，即被同屬泛民陣營批評該黨認同內地體制，甘願做「花瓶」，睇嚟該黨終於明白，參選人大係吃力不討好喇！

專業議政及公民黨仍未討論

除了白鴿黨有明確決定外，專業議政就話未有時間去商討人大選舉，因為要忙於立法會事務，而其他選委亦要花時間去應對高鐵一地兩檢方案，而喺全票制下，人數不多所發揮嘅作用有限，但亦稱到提名期時可能會有泛民有意參選都未定。

至於公民黨黨魁楊岳橋就話，要視乎黨員有冇興趣及是否合適，要再召開會議商討，強調目前言之尚早喎。不過，提名期兩星期後就展開，現時一切都未討論，某程度反映該黨興趣不大。如此看來，泛民真係有機會放棄今次人大選舉。