政情：社民連投年宵檔被托價
各個政黨每年都會競投維園年宵攤檔，支聯會尋日以三萬三千一百元繼續投得一同二號乾貨攤位，較舊年低約百分之三十五，成交價屬近十年新低，然而社民連則疑被托價，以三萬零七百七十七港元投得六號攤位，較舊年成交價高百分之三十六，主席吳文遠直指價格諷刺林鄭月娥以七百七十七票當選特首。
比預算多咗兩萬
較舊年高價格投得六號攤位嘅社民連，吳文遠事後喺Facebook貼文，指原本以為萬零蚊可以投得攤位，點知突然有位阿姐托價，愈叫愈高，推到三萬元，於是佢一口價三萬零七百七十七港元成功擊退對手。佢又話鑑於攤位成本較預期高，「大家識做，嚟緊年宵攤位捐多啲錢啦」！佢又指攤位將以支援被政治打壓嘅抗爭者為題，同埋諷刺林鄭月娥延續上屆特首梁振英小恩小惠嘅施政方針。
另外，工黨以二萬三千港元投得六十八號近通道嘅攤位。該黨社區幹事趙恩來話今年競爭激烈，價格升近一倍，「啲人好似傻咗咁」，只好改策略，但都要廿幾口叫價先成交。