政情：叫雞論駁火 雷鼎鳴鬧古肅 葛珮帆斥侮辱

雷辯稱係廣東話一部分

雷鼎鳴日前喺一個研討會講到內地生活已經方便過香港，仲舉例指有朋友「『叫雞』都係隊個咁嘅手機」，呢啲事香港仍未做到，事件引起各界質疑雷鼎鳴作為著名教授，其用字係咪有欠得體。雷鼎鳴尋日再次回應事件，指自己「講得好啱，用字好準確」，唔覺得講法有任何冒犯，認為「叫雞」、「雞」呢啲字眼已經深入民間，「變成廣東話一部分」，有電影名稱亦會咁樣使用。

被問到係咪可用較典雅字眼，雷鼎鳴唔認同，直指對呢種觀點非常反感，認為大學唔應該設立所謂嘅安全空間，言論自由唔應該有無聊嘅限制，只需符合不可攻擊或傷害他人等底線。佢又認為應以社會上嘅邊緣事解釋事情，因為解釋需要「貼地」，非主流事情都可以用到。

對於EQ希望佢唔好再用呢啲字眼，雷鼎鳴反而批評EQ「思想太古肅」。EQ對於雷鼎鳴嘅講法話十分憤怒，認為呢位教授濫用言論同思想自由，以動物形容性工作者係侮辱女性，亦帶有貶意，叫雷鼎鳴「返去再諗清楚」。

林超英批污染「教授」一詞

天文台前台長林超英亦喺社交網站暗批雷鼎鳴，佢嘅貼文指，講經濟、講管理、講效率、講方便、講言論自由，卻忘掉身份，忘掉人心，恬不知恥，「教授」一詞遭到污染。林超英仲叫大家同佢打招呼，唔好叫佢「林教授」。

雷鼎鳴今次失言，真係引起外界強烈批評佢有失身份，其實要貼地嘅例子都仲有好多選擇吖，如果用咗一個咁有爭議嘅字眼，帶來咁多負面嘅聲音，到底對於解釋內地生活方便過香港，係咪真係咁有益處呢？定係反而令到大家注意嘅焦點完全轉移咗去其他方面呢？睇嚟雷鼎鳴都要深思一下嘞！