中環出更：亂港冇建樹 民主阿婆遭厭棄
有「民主阿婆」之稱嘅前政務司司長陳方安生，作為政壇舊電池經常對香港事務指手畫腳，不時唱衰「中港」，實際卻毫冇建樹，結果喺一項最新民調中跌出「十大最熟悉政治人物」榜外，反映已被市民遺忘。而兩位前特首董建華同梁振英（CY）都過晒氣，排名都齊齊下跌。
香港大學民意研究計劃（港大民研）喺上月十六至十九日，以電話隨機訪問咗逾千名市民，其中喺十大最熟悉政治人物一項中，上次已敬陪末席嘅民主阿婆，今次更跌出榜外僅排第十五位。佢呢個政壇舊電池，影響力早已大不如前，但佢多年嚟仍不甘寂寞，多次赴英美等國唱衰香港，近期就趁香港回歸廿周年，多次批評一國兩制，務求唱衰「中港」，動作雖多但毫冇建樹，難怪被市民遺忘。
CY排名亦跌
CY民望跌或與收受UGL公司利益的醜聞有關，立法會議員林卓廷本周五將前往倫敦出席英國國會一個有關議事常規嘅會議。林卓廷話屆時將就CY作為DTZ董事時，收取澳洲UGL公司款項事件，係咪涉及貪污行為或逃稅，向英國兩大執法機關National Crime Agency（打擊犯罪調查局）同HM Revenue and Customs（稅務海關總署）舉報同投訴CY。
卓妮