中環出更：黃家和妙想 人體植晶片 隨時聽講座
香港品牌發展局同中華廠商聯合會（廠商會）尋日舉行電子書首發儀式，書內介紹香港唔同時期嘅品牌故事，仲邀請學者同企業家即場分享打造品牌經驗。品牌局主席黃家和笑稱，電子商務令傳統經濟嘅營運模式出現革命性嘅轉變，話唔定日後可直接喺人體植入晶片，大家只需安坐家中就可以聽講座，唔使坐定定喺度喇！
黃家和尋日作為主人家主持會議，但就着得好輕鬆，又冇打呔，佢笑稱一入場見到廠商會行政總裁楊立門都冇打呔，覺得現時電子商務當道，所以要潮啲，打呔好似好老土喎。坐喺台下嘅商務及經濟發展局副局長陳百里聽到咁講，即刻除咗條呔添！
楊立門鍾意睇傳統書
雖然依家電子書愈嚟愈普遍，但楊立門話自己都係鍾意睇傳統書，唔習慣喺手機度睇，因為好傷眼。就算睇電影，佢都係鍾意入戲院睇大螢幕。品牌局理事楊華勇就間唔中都會睇吓電子書，話同朋友分享時就最方便。
品牌局副主席陳國民、香港中華總商會永遠榮譽會長盧文端個仔盧金榮等人都有出席。最近盧文端夥拍中資財團以逾四百億元買入中環一座甲級商廈，消息備受市場注目，問盧金榮知唔知呢單大買賣，佢笑稱唔清楚，詳情要問佢爸爸喎。
盧金榮卸任香港菁英會主席之後，依家多啲時間睇住做拖篋、手袋等箱包嘅家族生意，講起最近有品牌推出可以幫手提電話或平板電腦叉電嘅行李箱，有啲仲可以將行李箱變成滑板車，佢話都諗緊計，希望為平凡嘅箱包注入新功能。
卓妮