政情：雷禮權綵排唱歌前仲食咖喱
由香港脊髓損傷基金會（基金會）及香港中樂團主辦嘅一場慈善音樂會將於本月底舉行，到時有份獻唱嘅九巴後人雷禮權（William）及彈奏鋼琴嘅名人邵在正尋日專登同香港中樂團一齊排練。現場聽William歌喉唔錯，不過佢就笑稱自己表現麻麻，喉嚨有啲乾，事關前晚食咗咖喱喎。
演出前要減五磅
講起唱歌，William話佢唱英文歌叻啲，今次係首次同香港中樂團合作，為咗襯番中樂合奏嘅氣勢，佢特登揀咗一首國語歌同一首廣東歌，不過國語歌被朋友笑佢發音唔準，所以要再練吓先得喎。貪靚嘅William喺演出前仲有件好重要嘅事要做，就係減肥五磅，以便以最佳狀態示人。距離演出仲有三個星期，佢話只要戒澱粉質食物就得嘞。
音樂會籌委會主席劉懿翎、中樂團常任指揮周熙杰都有到場，劉懿翎同時係基金會董事會成員，佢話今次籌款所得將由基金會及香港中樂團各得一半，希望款項為脊髓損傷患者燃點希望之餘，亦可藉機推廣中樂咁話。