中環出更：林景昇：年過40唔等於告別青春
逾百名歷屆傑出青年日前聚首慶祝傑出青年協會（傑青會）成立四十周年。傑青會主席林景昇話有傳言指世衞組織將年輕人嘅歲數放寬至六十五歲，所以就算有人四十歲先得到傑青嘅殊榮，亦當之無愧咁話。
林景昇話傑青之所以以四十歲為界，並唔係話年過四十就告別青春，而係為得獎人四十歲前嘅表現同成就作出肯定，當得到嘉許之後，就要為社會負起傳承及貢獻嘅責任。其實好多人喺四十歲後至開始踏上風華正茂嘅人生階段，而已屆四十周年嘅傑青會，林景昇亦期望將來能對社會發揮更積極嘅影響。
新婚嘅林景昇早前同太太到馬爾代夫度蜜月，驚覺當地只應及膝嘅水位，竟然漲至眼眉咁高，加上回港抵埗冇耐，天文台即罕有咁喺十月懸掛八號風球，都令佢感到溫室效應嘅問題好嚴峻，佢會藉傑青會所舉辦嘅論壇或研討會，進一步培育青少年嘅環保意識。
傑青運動員無懼年紀大
運動員又點睇四十歲為界呢？傑青、前劍擊運動員何嘉麗就話年紀大咗，講反應雖然係無咁快，但技術同戰術就會更老練，所以運動競技可按年齡分組較量，縱使年過四十都可以係運動生涯嘅另一開始，佢依家就喺劍擊之外，投身短跑、推鉛球同擲鐵餅等田徑運動。另一位傑青，前武術運動員鄭家豪就話論體力，當然係二、三十歲最頂峰，但現代社會對學歷嘅要求愈嚟愈高，變相令離開校門嘅歲數都延長咗，當具有相當社會歷練同人生經驗以發揮所長嘅時候，亦差不多年屆四十喇！
轉頭見到資深傑青龐愛蘭，佢成為傑青差唔多有廿年，但佢嘅外貌依然一如往昔。佢話「凍齡」秘訣係服用人參精華素，多種維他命同一種由野生三文魚提煉嘅魚油丸，但佢話服用補充劑養顏，都唔可以忽略均衡飲食。
卓妮