曾幾何時，「Made In Japan」係公認嘅品質保證，可惜呢個神話近日宣告破滅咯。隨着日本神戶製鋼所嘅數據造假醜聞愈鬧愈大，波及全球數百家企業，就連本港高鐵都可能遭受池魚之殃，呢鋪真係唔慌唔杰撻撻嘞。
嗱，有報道指本港高鐵列車嘅內地生產商疑透過日本川崎重工，間接購入神戶製鋼所生產嘅鋁材，用於製造高鐵列車嘅主樑架構，安全成疑咁話。神戶製鋼所就大耍滑頭，淨係承認有供應鋁材予川崎製造列車，高鐵係咪賴嘢暫時未知。至於港鐵就話，唔會完全依靠供應商提供嘅數據，任何承辦商均須通過測試要求，暫時鋁材測試結果滿意，但會繼續了解事件喎。
講起都難以置信，日本仔做事向來有板有眼，有規有矩，「匠人精神」嘅美名就係咁嚟，點諗到家陣竟然成為造假醜聞嘅主角，神鋼不神，老闆道歉都補唔番。最諷刺嘅係，早前有傳媒揭發中國製造嘅新加坡地鐵列車組件及車身出現裂紋，當時港鐵回應事件仲沾沾自喜，話香港高鐵採用嘅係日本供應商進口物料，同新加坡唔同喎，結果話口未完就出事，外國月亮係咪特別圓，東洋貨係咪特別高檔，仲使講咩。
冇錯，中國製造長久以來都問題多多，甚至被指為假劣毒嘅代名詞，但事實證明日本製造一樣靠唔住，五十步笑百步嘅咋。再講吖，近年中國銳意改善品質，首批由中國製造出口美國嘅地鐵列車早前正式亮相，證明知恥近乎勇就會有進步。即係咁，查實無良奸商邊度都有，好似歐洲不時爆出食安事件，就連世界知名嘅德國車廠都因為品質問題及造假而需大規模回收新車，就知天下烏鴉一樣黑，來路貨唔等於係品質保證。
講到呢度，中國人崇洋媚外呢鋪癮真係要戒嘞。你知喇，自從鴉片戰爭後，中國人就失去民族自信，認為洋貨就係好嘢，尤其香港經歷百多年殖民統治，洋奴特別多。大家有眼見，港府一直迷信洋和尚會唸經，淨係西九文化區咋，請親都係洋總裁，可惜幾乎冇個做得長；又好似喺英國重金禮聘嘅港大校長馬斐森，任期未滿已下堂求去，問你服未。呢嗱，最近就連汪阿姐都睇唔過眼，炮轟西九文化區委任洋人做表演藝術總監，質疑外行領導內行，唔係冇道理o架。
都係講番高鐵嗰筆啦，全世界都知明年第三季就會通車，家陣一地兩檢方案仲係半天吊，如果高鐵列車質量又成疑，都咪話唔手尾長。所以話啫，唔該港府及港鐵千祈咪懶懶閒，最緊要加強監管，確保列車安全吖！