政情：黃進達：旅行團少用廉航

依家廉航愈開愈多，唔少後生仔女都會睇準時機買平機票，自由行都慳番唔少，隨時慳埋可以去多幾次旅行添，搞旅行團訂咁多機票，用廉航係咪仲慳呢？本身經營旅行社嘅香港旅遊業議會主席黃進達（Jason）早前出席一個活動時就話，旅行社搞旅行團，其實好少會用廉航(口架)！

Jason話廉航亦都唔一定係平(口架)，尤其係撞啱旺季，而且廉航唔太適合旅行團，主要原因係廉航唔包飛機餐，寄艙行李又要另外買，如果旅行團用廉航，就要逐樣問旅客，加上廉航又有機會延誤就會影響旅行團嘅行程，可能同參加旅行團嘅顧客期望唔太一樣，至於自由行產品呢，就有廉航嘅市場嘞！

搞咗咁多年旅遊，去過咁多地方，Jason自己又鍾意邊個國家呢？佢話最鍾意就係南美，因為食嘅嘢同香港好唔同，例如係燒烤，而且南美人好熱情，亦都係最與眾不同嘅地方喎！