政情：吳文遠冇睇新聞 鬧錯民建聯製造流會
立法會尋日下晝約三點，因不足法定人數而流會。喺發生流會事件兩個多小時後，社民連主席吳文遠喺社交網站Facebook貼文，狠批建制派第一大黨民建聯。佢聲稱民建聯喺議會嘅特徵係「懶」，強調只要民建聯議員「乖乖地坐底（低）開會」，立法會就唔可能流會，質疑該黨嘅表現對不起國家領導人。多名網民隨即留言附和吳文遠嘅講法，齊聲炮轟民建聯。
全因泛民全體缺席所致
不過，立法會今日流會，主因係全體民主派議員故意缺席所致。雖然建制派都有六名議員缺席，但佢哋分別來自工聯會、經民聯同新民黨等，無一來自民建聯。民建聯全黨共十二名立法會議員，喺流會前一刻全部都有「乖乖地坐低開會」，估計吳文遠發炮前冇細閱相關新聞報道。未知吳會唔會為自己今次鬧錯人，而收回言論同致歉呢？