中環出更：拳手馮興禮 入熱廚房棄比賽
返工冇耐嘅勞工及福利局政治助理馮興禮（Henry），大家有冇諗過平時經常西裝示人嘅佢原來係Boxer，仲準備好參加業餘比賽，但因為加入政府熱廚房而告吹。
官仔骨骨嘅Henry多年來都係打網球，以前經常跟爸爸、立法會前秘書長馮載祥同一眾前議員，例如吳亮星同黃宜弘等打波，直至兩年前先轉為打拳。唔通佢受到「神奇小子」曹星如嘅感染而想打拳？非也，Henry話係因為當時女友嚷着要減肥，所以一齊去拳館練拳，豈料兩人即同時迷上打拳。
怕失威 同女友分開練習
Henry話練拳真係拳拳到肉o架，無論直拳、勾拳、擋格都要練。身為男友多數唔想畀女友見到失威場面，Henry亦唔例外，話女友在場令佢壓力大增，連休息都唔敢，所以目前兩人暫時分開練習。
其實Herny早前亦計劃參與業餘賽事，佢話早前有一項以「白領」為主題嘅拳賽，畀作為打工仔嘅業餘拳手參與，但由於佢轉跑道入咗熱廚房，「唔通拎特區政府或者勞福局個名去打咩，輸咗點算？」所以佢最終決定放棄參賽。
卓妮