中環出更：AI發展驚人 曾鳳珠憂搶飯碗
隨着科技演進，人類傳統嘅生活格局面臨巨大轉變。香港菁英會下月二日舉辦嘅博鰲亞洲青年論壇，就會探討一下青年人該如何面對新時勢。菁英會常務副主席曾鳳珠直指人工智能（AI）對社會嘅影響亦係其中一個議題，事關AI既可助人，亦擔心會被搶飯碗。
曾鳳珠話因為籌辦今次活動，從而領略到科技發展嘅驚人成就，而AI無疑能造福人類，但AI經已發展到過去大家認為機器無法取代嘅工作領域，本身係會計師嘅佢，話過往以為會計係一門難以被科技取代嘅專業，但依家科技進展到電腦程式可以自動將文件分類，甚至識得填報稅表，佢覺得科技發展落去，有朝一日搶埋佢個飯碗都講唔定。
由於預期科技將會取代好多行業職位，曾鳳珠認為教育方向亦要適度調整，以迎合科技新時代。講起機械人，佢話想令到論壇更吸引眼球，打算問大學借兩個機械人到會場幫手做迎賓工作咁話。
菁英會創會主席施榮忻同現任主席莊家彬都有出席，而榮譽主席梁宏正就話，論壇亦會聚焦喺全球化嘅趨勢下，歐美國家點樣實施壁壘主義嘅逆全球化現象。
洪為民話世界貿易規則不合時宜
另一名菁英會榮譽主席洪為民（Witman）就話今日世界貿易嘅規則，係西方國家喺二三百年以來不斷累積發展而成，然而緣於大航海時代嘅貿易規則，已唔適應電子商貿嘅潮流。佢又舉例話，譬如因網購而興起嘅速遞行業，今日發展到向付貨人提供貸款，儘管數額唔大，但已經出現取代銀行角色嘅勢頭，佢話期望透過論壇，可以討論一下新經濟之下嘅世界貿易新秩序。
卓妮