香港喺早前一個全球安全城市排名榜上升兩級至第九位，睇落係威係勢咁款，其實金玉其外，敗絮其中嘅咋。話口未完啫，南亞兵團又出動做世界嘞，簡直鑊鑊新鮮鑊鑊甘，安全個鬼咩。
嗱嗱嗱，今次不幸遭殃嘅係兩名報稱來港做生意嘅內地客。係咁嘅，尋日凌晨一點幾，兩名內地客喺入住嘅旺角賓館歇息之際，十多名南亞大漢突然浩浩蕩蕩殺到，其中兩人闖入房內，苦主遭拳打腳踢不特止，裝有二百三十萬元巨款嘅背囊同埋一部手機亦一併被搶走，擺明有預謀撳住搶喇。
咁今次到底係第幾單涉及南亞兵團嘅搶劫案呢？相信大家數完手指再數埋腳趾都數唔晒，呢個治安毒瘤到底有幾毒，唔使問都知。即係咁，上門明搶已經夠晒猖狂嘅嘞，最弊係光天化日大街大巷嘅劫案亦不斷增加，淨係珠寶店巨劫案咋，今年最少有兩宗，都仲未計周街斬人搶錢嗰啲，市民及商戶有乜辦法唔提心吊膽吖？香港安全城市呢個朵有乜辦法唔係得啖笑吖？
功夫茶講到口水都乾，南亞兵團為非作歹，早就淪為香港治安毒瘤，點知港府好似借咗聾耳陳隻耳咁，對善意忠告置若罔聞，一味假仁假義，對假難民繼續中門大開，終於搞到南亞兵團尾大不掉，積重難返，治安毒瘤遲早變成絕症都似。家陣唔少市民老遠見到南亞族裔都會兜路行，呢啲唔係歧視，而係自保啫，港府係都要扮好人咯喎，市民咪被迫做醜人囉，新界更練團都要重出江湖就係咁解。
講嚟講去，最辛苦都係前線執法人員，好似入境處同警方咁吖，不斷要為港產官僚嘅婦人之仁執手尾，都咪話唔惡頂。但執法人員幾努力都好，涉及南亞兵團嘅罪案，破案率始終唔高，莫講話珠寶店巨劫案至今懸而未破，舊年全城關注嘅睡婆婆劫案一樣拉唔到人。鬼咩，少數族裔個個鼻高眼深，望埋去千人一面，除非有內鬼舉報啫，否則淨係認人都有困難。呢，近年陸續有少數族裔加入警隊，但係咪可以提高破案率，仲要睇過至知。
都係嗰句嘞，解鈴還須繫鈴人。香港之所以淪為南亞兵團食大茶飯嘅天堂，本地黑幫之所以有源源不絕嘅南亞新血，問題就係出在港府遲遲唔退出《禁止酷刑公約》，又拒絕重設禁閉營。最攞命係呢班人來港明明係搵着數兼破壞治安，司法依然慈悲為懷，部分政客仲要手指拗出唔拗入，香港唔淪陷至奇。當IS都就快玩完，香港嘅南亞兵團就強勢崛起，你話幾諷刺呀，港府再唔撥亂反正，唔通想香港變成第二個伊拉克？