政情：建制力保何君堯仍難安枕
立法會議員何君堯早前發起反港獨集會，集會期間有言論話要對主張港獨者「殺無赦」，引起軒然大波，有非建制派議員就其言論提出譴責動議，指佢嘅言論屬於行為不檢，但建制派就會保佢，提出議員議案不得就該譴責議案再採取任何行動。由於多名非建制派議員被取消議員資格，整個建制陣營喺分組點票下係夠票通過，但到底係咪個個都肯坐定定喺度幫何君堯就難講嘞，所以依家何君堯都係福禍未定呀！
非建制派議員將喺立法會大會動議譴責何君堯，指何君堯身為立法會議員，公開發表鼓吹殺人同煽動暴力嘅言論，屬行為不檢，按《基本法》解除議員職務嘅條文動議譴責何君堯。相關嘅做法喺以往都試過，提出動議後，辯論就會中止待續，議案所述嘅事宜會交付調查委員會處理。
不過，根據《議事規則》第49B（2A）條，議員可以動議一項議案，反對就有關嘅譴責動議再採取任何行動，經分組點票通過嘅話，就唔會成立相關嘅調查委員會處理，成個譴責動議就會終止。過往因為建制派嘅直選議席較少，難以通過該項議員議案，鮮有用呢個方法，但由於青年新政嘅游蕙禎、梁頌恆、社民連梁國雄、香港眾志羅冠聰、劉小麗同姚松炎相繼被取消議員資格，令建制派喺地區直選嘅議席佔多數，加上建制派喺功能界別有壓倒性優勢，呢個議員議案就有機會獲得通過，何君堯亦有一線生機，可能唔使被調查委員會調查。
人緣麻麻 未必個個願幫一把
據知，民建聯立法會議員陳克勤會提出按《議事規則》第49B（2A）條，動議不得就該譴責議案再採取任何行動。但咁唔代表何君堯可以坐定粒六，事關都要建制派肯坐定定幫佢投票先得。何君堯喺建制派人緣麻麻，加上今次嘅「殺無赦」風波搞出個大頭佛，建制派都未必個個願意幫佢一把。雖則如果通過唔到反對嘅相關議案，而要成立調查委員會，最終須要三分之二立法會全體議員贊成先能夠取消議員資格，但係被調查委員會調查都係一件麻煩事，所以何君堯都真係福禍未定o架！