中環出更：立會頻點人數 陳國基蛋撻探班
立法會尋日頻頻點算法定人數，一班建制派議員就好乖一個鐘頭先行開一次，唔知係咪知道佢哋辛苦，特首辦主任陳國基突然現身立法會，唔通要為佢哋打氣？
陳國基就話只係去立法會同議員打聲招呼，因為議員開會需要長時間坐喺度，所以就去同佢哋傾吓偈，唔算係打氣，而且都唔止係同建制派議員交流，但就講明希望唔好流會喇，更透露有議員建議佢買食物去慰勞吓，而佢就買咗蛋撻請議員食。
指一地兩檢應考慮民情
講到下星期辯論嘅高鐵一地兩檢無約束力議案，佢就認為高鐵只係交通工具，而且設施已經興建，希望能夠發揮其最大效用，又指議員應該考慮民情。不過，佢就講明議員係民意代表，政府做法只係尊重立法會，又認為議員唔支持可以投反對或提出修訂，但最好就咪拖延喎。咁同樣搞到議會熱烘烘嘅修改《議事規則》又點睇呢？佢明言無興趣理會，因為全屬議會內部事務咁話。