中環出更：潘權輝踢波捉住青春
唔少男士愛踢波，就係享受與一班兄弟為同一目標拚搏嗰團火。不過，呢個並非年輕人嘅專利，好似飲食業早前舉行四角賽，由四個業界協會出賽當聯誼，其中香港餐務管理協會永遠會長潘權輝就話要落場奔跑捉番住青春，聽見都覺得好熱血喎。
潘權輝話自從投身社會後就無再踢波，但一直熱愛足球，直至去到四十幾歲就覺得要重拾興趣，依家每個星期都會踢波，只為追求喺球場上奔跑嘅快感，仲話可以藉此捉番住青春添！不過，佢年幼時並無接受正式足球訓練，可能覺得有所遺憾，所以就贊助基層小學生學踢波，除咗訓練球技，亦希望學員可以從中學習團隊精神同紀律喇！
幟哥踢到眼鏡爛幾次
現代管理（飲食）專業協會會長黃永幟（幟哥）都有落場獻技，佢話從事飲食業人士經常為食物試味，會進食過量糖、油、鹽，所以必須靠多做運動，務求出一身汗將佢哋排走。其實踢波少不免有碰撞，幟哥就透露曾幾次踢到眼鏡爛埋，但因為唔習慣佩戴隱形眼鏡，所以今次都照戴眼鏡落場嘞！
比賽當日雖然落起微雨，但無阻一班球員嘅鬥心，決賽由香港餐飲聯業協會對戰稻苗學會，最終前者以二比零捧盃。不過，香港餐飲聯業協會青委會主席陳浩弘並冇落場，原因係太耐冇踢波，而近三個月仲轉咗做混合健身添，副主席黃浩鈞都有一同接受訓練，但體重竟然不跌反升，佢話係因為鍛煉出肌肉，強調唔係出汗後放肆進食喎。
卓妮