種瓜得瓜，種豆得豆，一個城市淨係識得內鬥內耗，最終只有沉淪；一間大學亦一樣，政治入侵校園，容不下一張安靜書桌，唔使旨意有運行，咁就唔怪得港大同科大近年實力此消彼長，再咁落去，龍頭地位分分鐘對調都似！
唔係吹水o架。有國際機構尋日公布全球大學工程學科排名，科大係香港唯一打入全球二十強嘅院校，喺工程及科技學科方面排名第十八；而喺計算機學科排名方面，全港冇一間院校能夠榮登全球二十強。
咪以為只係個別例子吖。某機構日前公布亞洲大學排名，科大由第四升至第三，港大就由第二滑落至第五。仲有就係英國《金融時報》全球EMBA排行榜，科大EMBA畢業生以平均年薪超過三百七十萬港元稱冠，傲視同儕。
類似調查結果仲有好多，篇幅所限恕難盡錄。大家睇到喇，近年本港大學校園七國咁亂，暴力衝擊、批鬥師長、恣意播獨甚至佔領校園，邊樣激進嚟邊樣，搞到校不成校，相對嚟講，科大生算係比較踏實，校園亦冇咁烏煙瘴氣。老人家教落「板櫈要坐十年冷，文章不著一字空」，今次調查涵蓋嘅工程、計算機等學科，學術成就冇得取巧，呢鋪科大鍊贏港大，再次證明一分耕耘，一分收穫嘅硬道理。
當然啦，一個巴掌拍不響，如果冇校長同教師姑息，年輕人都唔會咁容易行差踏錯。港大洋校長馬斐森一早劈炮等收工，一味和稀泥不沾鍋，旨意佢管教學生，盞嘥心機捱眼瞓；中大校長沈祖堯亦係一擔擔，將參與佔中學生同聖人相提並論，簡直不知所謂，中大生成為新一輪校園宣獨急先鋒，家陣知點解喇。至於講到教師咯喎，「佔中三丑」港大、中大各佔其一，特別係有「戴妖」之稱嘅「法律學者」戴耀廷，宣揚「違法達義」煽動學生上街送死，更加係荼毒一整代年輕人，有咁嘅教授，大學唔死都一身潺。
唔係話大學生應該「兩耳不聞窗外事，一心只讀聖賢書」，更加唔係叫佢哋好似某啲前輩咁，一味奉行「車仔」、「屋仔」、「老婆/老公仔」同埋「生番個仔」嘅「四仔主義」，問題係探求知識始終係大學生嘅主要任務，正如有人話齋，個人幸福係社會幸福嘅大前提，年輕人讀書不成自己都搞唔掂，仲講咩關心社會吖！
所以話啫，港大有朝一日被科大取而代之，只能怪自己唔爭氣。不過港大又唔使氣餒嘅，學術表現鬥唔過人啫，下次排名培訓年輕政棍、街頭鬥士，港大「一哥」地位肯定實食冇黐牙！