中華廠商聯合會（廠商會）最近因為改選會長而出現兩陣營互鬥，竟然鬥到要報警甚至鬧上法庭，真係睇到會內人心驚，會外人更加目瞪口呆。據熟悉情況人士話，今次出現搶票亂局係緣於授權制度出現漏洞，因授權人毋須喺選票上註明授予指定人士，就好似一張冇劃線嘅現金支票，邊個執到就可以當係自己嘅，所以搶票就要奇招百出嘞！
消息人士話好多會員已有投票傾向，但係自從本月初廠商會秘書處寄出選票畀會員之後，唔同陣營喺四出收票時就出現亂象，之後傳言滿天飛，亦分唔清真假，所以咪引起咁多爭議囉！既然發現問題係出自授權票混亂，據聞有人倡議廠商會應該修例堵塞呢個漏洞添！之不過，年底就改選會長，相信今屆就做唔切嘞！
由於現時只係由會員投票選出廿六名會董候選人，以便再同今屆有意連任嘅八十九名會董，一齊競逐新一屆合共一百一十個會董席位，所以可以預見未來一、兩個月，唔同陣營都會繼續搶票，再出現擦槍走火嘅情況亦不足為奇。