政情：鄧賀年爆粗 鬧政府活化鄉村
生態旅遊近年愈見流行，唔少偏遠鄉村都進行活化，吸引港人假日前往旅遊，好似荔枝窩就有民宿計劃，為偏遠鄉村尋找另一條出路。不過，並非所有鄉紳都支持活化計劃，好似錦田鄉事委員會主席鄧賀年尋日就喺鄉議局執委會上大唱反調，更爆粗鬧政府「X街」添！
皆因過去施政失誤
鄧賀年認為現時偏遠鄉村有活化需要，完全係因為政府過去施政失誤，先令到呢啲鄉村缺乏水、電同道路等基本建設，最終令到村民流離失所、遷離鄉村而出現廢屋囉。佢仲認為現時政府係基於對偏遠鄉村同情，先搵其他團體同人士進行活化，強調為鄉村加設水電等基建屬應分，所以形容政府係「X街」都唔怕喎。
另外，佢仲認為活化鄉村係提供機會畀外人踩入村，當中不乏情侶到訪，可能會喺旅途中嘈交，所以唔排除嘈完會喺村內燒炭而釀成命案，到時就會「仲X街」，大嘆活化鄉村得不償失。睇嚟一眾鄉紳對鄉郊未來發展都存有幾大分歧喎。