政情：葉劉發火 一帶一路 地圖出錯

斥貿發局「好丟面」

葉劉特登喺會上用平板電腦，展示貿發局嘅一帶一路路線圖，佢話有本地銀行櫃員機同支持一帶一路嘅企業，都會展示一帶一路地圖同路線圖作為宣傳，但呢啲圖都有相同錯處，皆因所有圖都係參考自貿發局。佢話貿發局嘅路線圖中，歐洲嘅線路只係去到中歐，但其實丹麥都有參與，所以係去到北歐；其次希臘亦有份，但貿發局嘅圖就未伸入地中海；最後係澳洲亦已經加入亞投行，所以佢認為貿發局嘅路線圖完全係過時，「我同（貿發局總裁）方舜文講佢又唔改，個個跟住佢錯」。葉劉又繼續批評「咁樣好丟面喎我覺得，冇理由我哋咁落後o架喎」，佢話呢啲係最基本嘅事，要求改正，講完仲有啲大力咁放低部平板電腦添，似乎相當激動。

邱騰華認可以改善

出席會議嘅商務及經濟發展局局長邱騰華承認路線圖可以改善，葉劉忍唔住插嘴，叫對方問吓外交部，「外交部話有一百多個國家」，邱騰華亦立刻回應，「我畀一個全面嘅答案你好嗎？」跟住又解釋，路線圖有一啲地方寫咗啲字，所以字就取代咗線連接嘅終點，而佢同意如果幅圖可以再畫得清楚啲去釋除誤解，以免啲人以為一帶一路唔包括歐洲，仲話會將葉劉嘅意見帶番貿發局添！

對於路線圖被指出錯，貿發局回覆查詢時就話當局提供嘅一帶一路資訊，都係嚟自國家信息中心嘅「中國一帶一路網」官方網站嘅最新訊息，而路線圖部分，當局承認只係概念圖像，註明僅供參考，實際路線或略有不同，又話會隨一帶一路發展而伸延到其他地區，當局會適時更新網站。

其實，港府有責任做好路線圖呢啲基本資料，以釋除議員同市民嘅疑惑，咁咪唔使引起呢啲爭拗囉！