中環出更：徒弟周浩鼎發言 黃定光照瞓
話說尋日喺一個立法會事務委員會會議上，民建聯（民記）議員周浩鼎（Holden）發言期間，竟然有一位議員呼呼大睡，究竟係邊個咁唔畀面Holden呢？原來係佢黨友兼師傅黃定光（象哥）！
兩師徒關注駐海外經貿辦
當時Holden正就設於泰國嘅駐海外經貿辦向官員提問，坐喺佢後一排嘅象哥呢個時候不敵睡魔，不斷低頭「釣魚」瞌眼瞓，期間象哥雖然扎醒咗一陣，但係好快又低頭合上眼皮，再次沉沉入睡，唔通佢對徒弟Holden嘅發言全無興趣？不過，之後象哥瞓醒，輪到佢向官員發問，佢問嘅咁啱又係有關駐海外經貿辦喎，到底係因為兩師徒心有靈犀？抑或係象哥其實係扮瞓，一直都有聽徒弟嘅發言再去追問呢？
另外，象哥又提到內地將自由行改為一周一行後，最近內地來港旅客人數又回復高峰，佢問當局有冇諗過有乜嘢措施應付，以免旅客太多影響北區居民生活。當局就回應話非內地旅客嘅增幅比內地旅客多，又指當局會研究利用一程多站，令旅客嘅旅遊重點唔會只集中喺市區購物。
卓妮