中環出更：內地公幹返港彭濼錡激瘦十磅
「美容天后」、身心美慈善基金創會主席曾裕（Joyce）旗下嘅美容集團早前舉行周年晚宴，Joyce同老公李守義（Francis）、契女兼身心美籌募委員會副主席彭濼錡（Cory）都盛裝出席，Joyce仲親自上台表演，十分玩得。卓妮見Cory瘦咗好多，原來佢啱啱喺內地公幹返嚟，佢話因為內地啲食物太油膩，唔啱食，結果半個月竟然激瘦近十磅。
Cory早排去內地拓展市場，跑遍北京、上海、廣州、深圳同廈門，由於天氣太熱，內地食物又太油膩，同佢喺香港少鹽少油嘅飲食習慣好唔同，所以食少咗好多嘢，估唔到就瘦咗十磅咁多。不過今次見到內地市場真係好大，好適合集團去發展美容產品，所以忙到瘦都值得喇！
曾裕享受屋企湊女樂
Joyce兩年前成功追到一對孖女之後，近年少咗出席公開場合，佢笑稱鍾意喺屋企享受湊女樂。Francis一講到BB就笑到見牙唔見眼，佢話兩個囡囡嘅性格好唔同，一動一靜，好動嗰個似媽咪，文靜嘅就似佢喎。當晚佢哋嘅大女Care都有表演，見佢亭亭玉立，成個小美人咁。
轉頭見到屯門前區議員林德亮，見佢戴咗一條色彩繽紛嘅領呔，上面有好多得意公仔，原來係醫院管理局送嘅紀念呔，因為佢喺區議員任內經常列席醫管局嘅地區諮詢會議。講開區內嘅醫療服務，佢感慨話仍然唔足夠，事關屯門冇私家醫院，居民有病只能去屯門醫院，佢幾年前大病都要去屯門醫院瞓通道病床添！
卓妮