中環出更：李華明全家出動 買樓抗辣招
港人夢寐以求有個安樂窩，即使政府推出樓市辣招，每逢有新樓盤推出都吸引唔少市民排隊入市。前立法會議員李華明（肥仔明）自二○一二年卸任議員後，開顧問公司又拍廣告搵真銀，賺到盆滿缽滿。尋日肥仔明就同太太現身環球貿易廣場（ICC）買樓，皆因佢太太抽中將軍澳一個新樓盤嘅三房望海單位，售價約一千萬元，預算支付一半首期。
屬長遠計劃 對香港有信心
肥仔明女兒三年前已抽中將軍澳一個近二千萬元嘅單位，事隔三年，肥仔明再同太太入市，睇嚟係想用盡家人名額抗衡樓市辣招。肥仔明話，太太一直鍾意將軍澳區嘅單位，所以有新盤就「出擊」，抽咗幾次終於揀到樓，好似中咗六合彩咁。
雖然政府無意撤樓市辣招，但肥仔明就話，一家人都要有長遠計劃，而且佢對香港有信心。被問到多咗一個物業會用嚟自住定係放租，佢話單位要兩年後才入伙，到時再「彈性處理」。
卓妮